Od zgora (po)gledano – Živio Dan žena!!!

Živio Dan žena!!!

Piše: Pepina Matujska

Dan žena je za ki ta dan, pa me j’ to domislelo kakova su nekada to slavja bila. Bila san mića, ma va škole su nas vadili da j’ to Majčin dan i da za voljenu mamu rabi storit neč lepo (uglavnon su to bili neki crteži na drve, nekakova čestitka, ukras od karti i sl.), prnest njoj kakovu rožicu (na pute od školi do doma smo si po jednu visibabu pobrali) i baren taj dan bit poslušni i dobri i ča pomoć (pomest, pomit, pospravit stol…). Kako su taj dan i sati bili skraćeni i nan je to bila fešta. Gubili smo se malo okol školi, smeli se i ćakulali.

Mama je z dela prišla z više boki, velo, mićo, unjule rožice, pokloni seh sorat, uglavnon neke monadi, ma si smo se temu veselili. Obed je bil malo boji i za stolon se j’ samo povedalo kako će se s trajbun poć vanka, malo se podružit, aš da se ženske gredu i da bil greh bil doma bit!

Tako j’ partila, veselila se i zabavjala z kolegicami i prijatelicami i ni na uru gledala. To j’ bil samo niji dan, dan kada se j’ moglo na brigi pozabit i ćapat nove energije za naprvo, aš i onda je bilo i brig i problemi, samo ča su se judi nekako više skupa držali nego ča se daju danas.

Danas se j’ se promenilo! Za sen ten ča si imamo magar jedan telefon, dogodi se da van se rojendana niki ni ne spameti (osim ako niste na fejse, pa van čestitaju i neki keh ni ne poznate). Prijateli i dragi judi ne vidite skoro nikada, aš smo si rastegnjeni na sto kraji i saki misli najviše na svoji posli.

A pak Dan žena, će van to ki uopće čestitat? Će van se ki zahvalit za se to ča delate, ča žrtvujete svoje slobodno i dragocjeno vreme za stvari ke vas ni ne pijažaju, ča obavjate i organizirate živjenje celoj familije? Će van se ki zahvalit samo za to ča ste tu, ča volite bez razloga i ča postojite?

Ne moren van ja dat odgovor na to, moren samo reć ča ću ja storit i bit srećna. Parićat ću za sebe i za se svoje drage prijateljice (ali i prijatelji) neko iznenađenje. Rožica, čokolatin, lepa beseda…ča god, ča mi taj dan pride od inspiracije. Reć ću njin da mi j’ drago ča su tu, ča su moji prijatelji, ča mi uljepšavaju živjenje i ča skupa moremo menjat i svet!

Reć ću njin i to da niš ni bez razloga, pogotovo činjenica da smo se va isto vreme našli na isten meste i da od tega ne smemo i ne moremo pobeć. Za poć naprvo moramo se držat skupa, pomoć si va teškeh momenteh, smet se va oneh lepeh, a i plakat kada rabi.

Taj dan, ma i saki drugi, je prilika, da rečete dragen juden se ča mislite: da jih volite, štimate, da van se pijažaju, da volite njih dih, njih glas, ruki, pogled… Ne bojte se, niki van to neće zamerit. Saki voli čut lepu besedu i zapameti je za celo živjenje.

A živjenje?
Jedno je! Kratko je! Komać kada počnete uživat shvatite da ste već do polovice prišli…

Zato ženske (i si drugi) uživajte koliko god morete, saku priliku ku imate iskoristite, ne gledajte ča te drugi reć i ne obrnjajte se nazada!

Živio Dan žena!!!

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net