Od zgora (po)gledano – Zač se ja toliko toj promene uri veselin?

sat_unatrag

Piše: Pepina Matujska

Promenila se j’ ura! Napokon!

Znan reć ćete da ča ova poveda, tr to j’ bilo još neki dan, stara tema, već je čuda noveh i zanimljivejeh, ma nekako mi se vidi da je ova sejno dobra.

Zač se ja toliko toj promene uri veselin?

Pod broj jedan zato ča san tu noć mogla jednu uru daje spat. Nan ki volimo do kasno hludit, gledat televiziju, slat sms-i i mms-i, pa nas jutro pijaža pospat, ta jedna ura znači više nego ča čovek more zamislet. Va toj jednoj ure su mi se dogodile zanimljive stvari. Sanjala san svoj najlepči san kega sanjen već više let. Isti ljudi, ista priča, samo ča je saki put još malo proširena i vavek va njin dobijen neku novu ideju, zadovoljstvo, plan za naprvo… Neč kot „saki izlaz je ulaz za nova iskustva…?!“

Pod broj dva, a to je nekako i tri i četiri i pet i…, a ne nužno z oven redosljedon. Rano je škuro! Zima je! Držimo se va zaprten i teplini. Hm, hm. Jas sada nekako to ne bin naprvo niš tumačila, aš bi bilo da videj prasicu lih njoj se od pomije sanje. Sako moje objašnjenje finilo bi kot kada je Mujo šal kravu pomust, pak mu se j’ dogodil niz čudneh, ma realneh situacij, pa je ispalo da on neč drugo dela, a ne da muze…

Vi lepo sada sami zaključite i promislite ča vas va oven zimsken vremene najviše veseli: šparget netit, palačinki frigat, stiskat se pod ponjavicun, čitat, gledat televiziju, fejsat, kuhat rakiju, parićevat se za prasca ubit, čekat Dan republiki, hodit po šume….

Mane, se to veseli! Najvažneje je da san va dobroj kumpanije, z judi ki me moru razveselit i nasmet i ki se vesele i smeju skupa s manun. Tr to j’ živjenje – jedno velo veselje. Samo ča ga j’ trebe tako prihvatit i opustit se. Ako neč jako želite to će van i prit. Morate bit ustrajni, uporni i borit se za ono ča otejete i ono ča volite. Ne se sramit reć, budite iskreni. Ako van pride da nekemu dragemu otejete reć lepu besedu, ne čekajte, nego zajeno rečite. Niki van to neće zamerit.

Tako ću ja danas za kraj ovega teksta reć da san srećna ča bivan ovde. Ča iman priliku va isto vreme i na isten meste bit z nekemi judi ki su mi, saki na svoj način ispunili živjenje, pokazali mi neke nove cesti i upoznali me z pravilon broj 1. Ti judi zaslužni su da san jas danas ovo ča san. Da san najsrećnjeja jušto kada san š njimi i da va ten jako uživan. Na njih mislin cel dan. Š njimi va misleh zaspin i jutro se š njimi va isteh misleh zbudin. Tu su za me kada mi rabe i znaju da san i ja za njin celi dan i noć na raspolage i da na mane moru vavek računat.

Enigma…

Do kraja živjenja…

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net