Intervju: Marin Aničić, fotostriper

marin_anicicOpatija – Galerija Opatijski portun, ove subote, 31. srpnja, od 18 sati pa sve do jutra feštat će na otvorenju izložbe ”Fotostrip” opatijskog fotoreportera Marina Aničića. Rubrika kojom je uveseljavao svekoliku javnost napokon je preseljena na ”veliki format”, a mi smo odlučili iskoristiti situaciju i Marinu postaviti nekoliko pitanja.
Liburnija.net: Koliko stripi će bit, kako je storena selekcija?
Marin Aničić: Ja san se to skupa složil na brzinu. Ideja je pala kad smo Salpa i ja sedeli va njigoven ”portune” i pogovarali se ča bi se se tu moglo delat. Pital me je ako bin ja ča izložil. Mane to nikad ni problem samo treba nać smisal, a kako je “Opatijski portun” , ko ča i samo ime galerije govori, ta neka naša štorija, prvo ča mi je palo na pamet je “Marinov fotostrip” kega san ja jeno tri leta delal za Liburnijski list prilog Novega lista.
Liburnija.net: Kako je krenula štorija oko foto-stripa? Koliko ih je sve skupa napravljeno?
Marin Aničić: Prvi ”okvirić” je nastal, ko i se pul mane, da bimo se malo nasmeli. Mesić je bil predsednik i prihajal je v Opatiju. Va to vreme sej delala Thalasoterapija i Ranko Vlatković je bil gradonačelnik. Ja san na ten dele storil jenu sliku dokle`j Alenčica (Alenka Juričić, novinarka Novog lista, op. D. Ž.) zimala izjavu od našega bivšega državnega poglavara, jušto za nju da si ima za uspomenu. Okol njih je bila cela svita, gradonačelnik, župan, ravnatelj ustanove, si dohtori… Brižna Alenka, po celi dani je delala a nikako da je prime “za stalno”. Ti dni smo imeli čuda dela okol Lburnijskega lista tako da san ja užal gubit noći va urede, pa kad san se storil, kot i saki ki preveć dela, nisan se zajno fermal nego san vođen z svojemi i tujemi frustracijami moral storit neš beznačajno da se malo nasmejemo i olakšamo si dušu. Zel san tu famoznu fotografiju i na najprimitivneji kibernetički način storil jedan stripić va ken je Alenka bila glavni antiheroj ki se žica pul predsenika za delo, a naslov je bil “Mala je pitala”. Ja san njoj to lepo stavil na njiji desktop kad ujutro pride na delo da ima ča videt.
Prišlo je jutro i taj stripić je videlo celo dopisništvo. Si su se jako smeli a kako je već Liburnijski list bil za zaključit, Ivo Kirigin, kemu sej to jako pijažalo je rekal da ćemo to lepo stavit nutra. Tako je ta moja zafrkancija trajala jeno tri leta i postala jedan oblik odgovornosti. Kad celi život bežiš od odgovornosti onda ti Bog da obavezu da se šališ odgovorno.
Liburnija.net: Kako su ti dolazile ideje?
Marin Aničić: Imel san inspiraciju po celoj Liburnije. Nastojal san uklopit neka događanja ka su obilježila taj mesec. Moja šefica Mirjana Rončević bi mi dala vavek neki ultimatum do četrtka jutro pa san ja delal uglavnon po noće. Važno mi je bilo da se ćapan tega kad bi baš se finil aš mi je za strip trebala prazna glava. Neki put bin vrtel slike va kompu pa bi mi pala ideja, neki bi ča sugeriral kroz dan, ja bin čital opatijske stranice od celega meseca i tako bi se pomalo gradila ideja.
Liburnija.net: Ča će sve bit na otvorenju – klopa, muzika, hostese?
Marin Aničić: Si ki ovo čitaju i gledaju su pozvani. Mi smo parićali jeno 30 slik, pijaču i za jist, a jedini sponzori ili suizlagači su judi ki mi pomoru oko realizacije, a da van ne nabrajan, je jih i sen njin skupa jena vela pusa!

Liburnija.net: Jedan od Marinovih fotostripova objavljenih u Liburnijskom listu - prilogu Novog lista!

Liburnija.net: Jedan od Marinovih fotostripova objavljenih u Liburnijskom listu - prilogu Novog lista!


Davor Žic / Liburnija.net
Vezane vijesti:
Video: Va Pule s Danielom Načinovićem
Razgovor: Godina dana “FOO” fajtera

error: Content is protected !!